دبابيس من صحف الثلاثاء 13 يوليو 2021م

ه
ه
⚠ *سؤال* :
👈 ممكن زول يورينا ماهو الدور الذي لعبه كل أو واحد من : مكونات وأحزاب (قحت) أو المجلس السيادي أو المنظومات العسكرية أو مجلس الشركاء أو الذين هبطوا من السماء في ما تم من انجاز في ملفات :
– رفع اسم السودان من قائمة الدول الراعية للإرهاب
– إعفاء ديون السودان
– الحصول على قروض من مؤسسات التمويل الدولية
– الإنفتاح على المحيط العالمي وتبادل المنافع مع الأسرة الدولية
– عودة العلاقات والتحويلات البنكية بين السودان والبنوك في الدول الأخرى (دون وسيط)….
– حذف اسم السودان من قائمة الدول المتهمة بتجنيد الأطفال.
– انضمام السودان إلى منظومة ال (IBAN) لتسهيل المعاملات المصرفية بين البلاد وبقية دول العالم.
– عودة المعونة الأمريكية ووصول شحنات القمح الأمريكي الى السودان
أنا شخصيا كل الذي اعرفه عنهم هو محاولاتهم الجادة لتفشيل المساعي التي كانت مبذولة لتحقيق كل ما ورد أعلاه وسعيهم الدؤوب لوضع العراقيل في طريق تحقيقها…..
ه
ه
⚠ *تااااني جاب سيرة بنك الخرطوم*
👈 كتب حمور زيادة بالأمس على صفحته في الفيسبوك تحت عنوان (اول تعامل مع بنك الخرطوم.. واخر تعامل ان شاء الله)….
قال فيه: عاوز اغير عملة اداني 160 ألف خمسينات وميات! لما رفضت اشيلا وقلت للموظف ليه ما كلمتني انو ما عندك ورق كبير هاج وكورك وقال لي ما بوريك دي القروش العندنا! وزميلو عاوز يخوفني قال لي دي عملة سودانية مبرئة للذمة كيف ما تقبلا؟ قلت ليهو ما ممكن امشي لي بكمية رزم زي دي! ويا تديني ورق كبير يا تلغي عملية التغيير. قال لي ما بتتلغي وفضلنا نتجاوط لفترة لحدي ما جات زميلتهم وقالت ليهم خلاص الغو ليهو العملية.
المزعج غير التعامل السيء من موظفي البنك انو المواطنين بقو يدقو جرس ويقولوا للموظف لو اديتنا عشرينات بنشيلا! وبدأوا يهرجوا فيني انو شيل القروش! ودي نفس القصة المزعجة الشفتها في مركز التطعيم. المواطنين مستعدين يقبلوا اي حاجة بس يخلصوهم!
ياخي ده لو تاجر عملة في السوق العربي ما ممكن يديك رزم خمسينات تمشي بيها!
تجربة سيئة جدا وكريهة، وتعامل غير محترم من الموظفين….. انتهى
📌 سوء تعامل (بعض) موظفي البنوك السودانية وصلفهم وقلة أدبهم اصبح زي الانفلونزا الناس تحاول تتعود عليهو مافي حل تاني……
ه
ه
⚠ *تأكلون النفايات أكلا لما* :
👈 يقول الطبري في تفسيره لقوله تعالى : (وَتَأْكُلُونَ التُّرَاثَ أَكْلا لَمًّا) يقول تعالى ذكره: وتأكلون أيها الناس الميراث أكلا لمًّا، يعني: أكلا شديدًا لا تتركون منه شيئا……..
تلقت 📌 الدبابيس 📌 رسالة من أحد القراء مصحوبة بصور مقززة لأبعد الحدود من مصانع لإعادة تدوير البلاستيك داخل مردم (أبو وليدات) بامدرمان حيث توضح الصور أن المصانع تقوم بتتدوير نفايات طبية (دربات وسيور دربات وعبوات عينات وامبولات فحص وأكياس نفايات طبية) وهي مواد ممنوع إعادة تدويرها رسميا لما فيها من خطر كبير على صحة وسلامة الانسان والبيئة
علماً بأن المستشفيات تدفع رسوم عالية جدا على هذه النفايات لإتلافها وليس إعادة تدويرها ولكن النفوس المريضة الكارهة لهذا الشعب المسكين تقوم بتدويرها وإعادة بيعها له في منتجات يستعملها دون أن يدري….
📌 اللهم أن بنا من الجهد والضنك والضيق والظلم مالا نشكوه الا إليك ، اللهم أهلك الأعداء واقصم الطغاة وانصر الضعفاء . اللهم كن لنا ناصراً ومؤيداً ولأعدائنا قاهراً و مزلزلاً….
ه
ه
📰 الوطن:
👈 الحكومة تتسلم إنتاج ذهب جبل عامر
📌 شركة بدر للطيران واقفة والا شنو؟
ه
📰 الوطن:
👈 عضو بالسيادي :منصات خارجية تستغل البلاد لتصفية حسابات بالإقليم
📌 عندك أسماء قولها ، لو خايف منها والا عندك معاها مصلحة نقطنا بسكاتك
ه
📰 الوطن:
👈 روسيا تدعم السودان لرفع عقوبات مجلس الأمن الدولي
📌 دا طريق نحن مشيناهو برانا وقطعنا فيه شوط طويل
ه
📰 الوطن:
👈 تفاصيل جديدة في قضية خط “هيثرو”
📌 كل يوم تفصيل ، هي القضية دي في محكمة والا في مصنع ملابس
ه
📰 الصيحة:
👈 مناوي لـ”الصيحة”: حركات غير موقّعة على السلام تشكّل خطرًا على دارفور
📌 يازول شيل حيلك وأمشي على شغلك بلاش رخرخة معاك
ه
📰 الصيحة:
👈 نشر”2000″ كاميرا مراقبة لحفظ الأمن بالعاصمة
📌 ههههه والله يسرقوها ويبيعوها طالما عندنا تجار يشترون المسروقات
ه
📰 الصيحة:
👈 توجيهات عاجلة بإزالة المتاريس وفتح الطرق ببورتسودان
📌 توجيهات مصحوبة بفعل والا شحدة ساكت ؟
ه
📰 الصيحة:
👈 والي الخرطوم: فشلنا في ملف النظافة
📌 الاعتراف بالفشل خطوة في طريق النجاح
ه
📰 الصيحة:
👈 “الحرية والتغيير” تسمّي حمدوك عضوًا في المكتب القيادي بهيكلتها الجديدة
📌 انا لو مكان حمدوك أرفض وليس اعتذر
ه
📰 الحداثة:
👈 إدانة المتهم في قضية الشهيد شوقي الصادق
📌 عقبال القصاص
ه
📰 الحداثة:
👈 والي وسط دارفور: الولاية لم تشهد أيّ نزاع إثني خلال الأشهر الماضية
📌 مالهم اوع يكونوا عيانين ؟
ه
📰 الحداثة:
👈 رفع اعتصام كلية الطبّ بعد تعهّدات بتنفيذ مطالب الطلاب
📌 الصلح خير
ه
📰 المواكب:
👈 تجاوزات بمليارات الجنيهات في شركة الصمغ العربي
📌 دا بلف شغال من زمااااان
ه
📰 المواكب:
👈 الحكومة تتعهد بتوفير 126 مليون دولار لإعادة تأهيل سكر النيل الأبيض
📌 أبعدوا من سكر مشكور
ه
📰 المواكب:
👈 مريم الصادق المهدي تكشف تفاصيل الجلسة المغلقة مع نظيرها الروسي
📌 هي جات راجعة والا كشف من بعيد لي بعيد
ه
📰 المواكب:
👈 مجلس الأمن و الدفاع يتخذ قرارات أمنية طارئة
📌 الفي القدر يجيبو المغراف
ه
📰 المواكب:
👈 عطلة عيد الأضحى تبتديء الأحد و تنتهي الخميس
📌 أعاده الله علينا وعلى الامة الإسلامية بالخير والامن والسلامة
ه
📰 السوداني:
👈 وزير الداخلية : حادثة تفجير نادي بورتسودان إرهابية ولن نترك من يخرج على القانون
📌 نشيف
ه
📰 السوداني:
👈 توقف عمليات السرطان بمستشفى الذرة
📌 اول العمليات كانت شغالة ؟
ه
📰 السوداني:
👈 اجتماع مجلس الأمن والدفاع (بالروصيرص) لمناقشة تهديدات سد النهضة
📌 هسع الروصيرص دي لو في دولة تانية كانت مريم الصادق جاتكم تجري
ه
📰 السوداني:
👈 مشروع قانون للطفل يبيح حرية العقيدة ويمنع الانتقال لخلاوي خارج الولاية
📌 من أهم شروط العقيدة البلوغ الطفل ماله ومال العقيدة..
ه
📰 السوداني:
👈 وزير الصناعة : ملتزمون باتفاق للنظام السابق مع مزارعي سكر النيل الابيض
📌 الاتفاق ذاتو اكتبوهو في ورقة جديدة ، ما عاوزين حاجة تذكرنا بالنظام السابق
ه
ه
📌ابووضاح 📌
https://www.facebook.com/dababies