عمك تنقو..!

عادل سيدأحمد
… حا أهريكم …!….

ناس (حميدتي )،في دارفور يرددون “الله أكبر”..!
الكيزان لازالوا يرددون “الله أكبر”..!.
الزول ال ركب الجماعة الهواء في الإسكندرية،
حينما زنقوه ،قال “الله أكبر..!.
وبتاع البراء،ضارب همبريب ميامي،وبيقول “الله أكبر “..!.
…………………..
(؛)الفنان الكبير مجذوب أونسة كان نازل مع صديقه (بشير)،في القاهرة..
يتسامران يومياً،حتى الساعات الأولى من الصباح..
(بشير)يتحدث ،في الموضوع الواحد،لمدة ساعتين،على الأقل..
ودائماً ما يختم كلامه بعبارة(لا أطيل عليك الحديث)..!.
في تلك الأيام كان في جماعة عندهم عرس..
وطلبوا من أونسة يجي يغني ليهم ..جادلوهو في “العداد”..وعذبوه..!.
أونسه عاوز يستخدم ( عبارة بشير)،ولكنها تمنعت،وأبت تجي….!.
فنادى على صديقه قائلاً:(إنت يا بشير،الكلمة ال قعد تقولها ديك شنو..)؟!.
فصاح بشير:(لا أطيل عليك الكلام)..!.
فحسم أونسه مُعجبيه،بهذه الجملة.
………………….
نفس الحكاية دي حصلت معاي،قبل يومين.
قدر ما حاولت أتذكر عبارة معينة(كُنت حافظها )لأوصف بها (دراما حرب دارفور،
وميلودراما بورتسودان،
وتراجيديا الاسكندرية)
..وفيلم (البراء والبصات)..
ما اِتذكرت ..!.
لي صديق ودُفعة في السعودية..هو صاحب هذه العبارة..أنا حفظتها عنه،من أيام الخلوة (أنا خلوي ديامي)..!.
تقول لي الموبايل بيعمل هزاز..نحن من يومنا ب(نهز ونرز)..وذكاءنا اِصطناعي..!.
وال ما عاجبو،،الباب يفوِت (جبل)،على حد قول جارتنا زمان،حبوبة ست الجيل،ومقولتها المحورة الجميلة،
وتحريفاتها الرشيقة هذه..!.
المهم،اتصلت بصديقي هذا،وسألته..فذكرني بهذه العبارة..وطلعت هي:
(مَنْ سرق المصحف؟!.).
…………………….
لا أطيل عليكم الحديث،يا قُراء الوطن..!.
(!!)إنت يا عبدالملك (ميلودراما)دي معناها شنو..؟!.
إنجليزي دا يا النعيم..؟!.