في رثاء يوسف وسيد احمدخليفة
كلمات عمار محمد ادم
يوسف سيد احمد
ياحزن جوايا بتق
ياحنين بالشوق معتق
ياجرح ينزف كتير
اعزي علاء والامير
اعزي احمد وابنو الصغير
وياعلاء.. قدر الله خير
ولي بنياتك بعزي
وامهن ليها العزاء
وماك كتير علي الله تب
ياكريم لطف وادب
انت زول معطون كرم
وانت زول راي وفهم
ما بتكفي التباريح والالم
تنزف عيوني دموع ودم
خطيت خطاي وبي مهل
يوسف خلاص ودع رحل
سايق خطاك وفي عجل
يوسف اخوي والله جد
يوسف سيد احمد احلي زول
هد الحزن اعضاي هد
وبكيت كتير
وشعرت بي وخز الضمير
اني ما ودعتو في اخر لحظة
من قبل مايمشي القبر
والله جد هو فراقو مر
ويا الله ادينا الصبر
في رثاء والده___
تبكيك العيون واذرف عليك دموعى
تبكيك القلوب والحزن بين ضلوعى
اكتبلك سيد احمدالليله وين موضوعى
ترحل يا حنين الموت هدم مشروعى
ابكيك يا سيداحمدحزن البلد من جم
حقيت الشعار (صوت الغلابه نضم)
ابو السيد الوداع انا مانسيت حرم
عالجت المريض واضفيت علينا كرم
ابو السيد الوداع الناس تئن تتباكى
سائلين الكريم تبقى الجنان ماواكا
يغفر لك كريم وتحمل كتاب يمناكا
محزون يا سيداحمد ربى بيطيب مثواكا
تبكيك الجريده وتبكيك صباح الخير
فى يوم التقيتك ما كنت قايلوا أخير
تبكيك الحروف وتعجز عن التعبير
متاثر شديد وازدت فى التاثير
تبكيك الديوم وتجعر مع السجانة
وتبكيك البلد تهتز من اركانها
تبكيك الدموع تذرف كتير هتانة
انكسر القلم بوأتو اعلى مكانه
تبكيك الصحافه ما كنت من فرسانها
تبكيك الدبيبه تفرش كبير صيوانها
تذكرك الارامل تلقاها كيف محنانه
محزون يا سيد احمدودموعنا حان اوانها
