قالو لينا المطره صبت ..

‏الرياح
‏والأتربه ..
‏بيتنا أودعناهو ليك ..
‏يا الله حارس .. الدواليب
‏والشنط ..
‏باقي الملابس .. الصور ..
‏ والمكتبه ..

‏قالوا لينا المطره صبت ..
‏الرياح .. والأتربه..
‏ مين بلم .. باقي الغسيل ..
‏أو مين بدخل مرتبه ..
‏ البهارات .. في العلب ..
‏كيس الدقيق ..
‏في المسطبه ..

‏ياربي كيف حال الترابيز .. المفارش ..
‏والستائر ..
‏ البراويز ..
‏في الحيط .. حال السراير ..
‏وياربي هل .. مويتنا جات ..
‏في بيتنا جات الكهربا ..

‏قالو لينا المطره صبت ..
‏تلقي حوشنا ..
‏ الليله عايم ..
‏لا في صوت طوريه هبت ..
‏لا .. ولا ..
‏ ضحكت نسايم ..
‏كلو أودعناهو ليك .. رب الودايع ..
‏انت شايف .. وانت سامع ..
‏حال ظروفنا المرعبه ..
‏قالو لينا المطره صبت ..
‏الرياح .. والأتربه …..

‏عبد الوهاب هلاوي