دبابيس من صحف الاثنين 02 أغسطس 2021م

ه
ه
⚠ *سؤال* :
👈 هل حصل يوم واحد سمعتوا بي سفير من سفرانا في الخارج التقى برعايا دولة أخرى او مثلا في دول الخليج التقى بالبدون والا بزعيم الطائفة الشيعية في المنطقة الشرقية بالمملكة والا في البحرين ؟ علماً بأن سفراء الدول الأخرى في السودان أي واحد فيهم عامل له مسيد والمريدين داخلين مارقين وبعضاً منهم يجي شايل قزازتو للمحاية دا غير الحجبات…..
ه
ه
⚠ *قصة قصيرة – تبرعات الذين هبطوا من السماء* :
👈 قائدان اثنان من (الذين هبطوا من السماء) قاما بزيارة الى مصنع سكر سنار والتقوا بالعاملين الموسميين الذين يقطنون بالكنابي في داخل المشروع ، وسعيا منهما لكسب ود شعب الكنابي تبرع أحد القائدين بجوال سكر لكل عامل وبعد اللقاء ركبوا عربيتهم ومشوا…..
لا دفعوا تمن السكر للمصنع ، لا جابوا تصديق من المركز بالكمية ، لا كان معاهم سكر وزعوهو على الناس ، لا عندهم مخزن الناس تروح تستلم منه ، لا هم تجار سكر عندهم طلبية جاية عشان الناس يقعدوا ينتظروها ، لا هم ذاتهم حلوين عشان نقول شوفتهم سكر…..
(الأرصاد) يتوقع في أي لحظة حضور قوة مسلحة تابعة لأحد الرجلين (أصلا التاني كيسو فاضي) الى مخازن المصنع والاستيلاء عليها وتوزيع السكر على المواطنين عنوة واقتدار وحتى لا تقع كلمة قائدهم واطة ويشيلوا الباقي معاهم ومن في ايدو بندقية عينو قوية…..
ه
ه
⚠ *في حديث عن “إزالة التمكين”.. جبريل إبراهيم: “حيريسونا ويتيّسونا”* :
👈 الخرطوم : النورس نيوز….. كشف وزير المالية جبريل إبراهيم، أنّه تقدّم بطلبٍ لرئيس الوزراء بإنشاء لجنة مستقلة لاستلام أصول وأموال لجنة إزالة التمكين، وأوضح أنّه حينما تسلّم المالية وجد لجنة مشكّلة من وزير المالية السابق، تضم عددًا من الأطراف ليست المالية وحدها لاستلام الأموال من لجنة التفكيك، أكّد أنّ لديها حسابًا تجميعيًا خاصًا، وقطع بأنّ المالية لا علاقة لها بهذا الحساب.
وقال جبريل في إفاداتٍ لصحيفة اليوم التالي الصادرة اليوم الأحد، إنّ الوزارة اتّخذت قرارًا بحلّ تلك اللجنة.
وأضاف” إنّ كلّ الشعب يسمع من لجنة التفكيك أنّ الأموال المصادرة أو المستردة تسلّم لوزارة المالية ما يعني أنّ المالية هي التي تتحمّل المسؤولية، ولكن من الناحية الفعلية غير ذلك”.وتابع” إذا لم نرتّب الأمور بطريقةٍ صحيحةٍ حيريسونا ويتيسونا”……
📌 الكوز ساعة يشوف له قروش قدام عينه كان ما لهفها مابيسكت زي الشافع ساعة يشوف له حلاوة……
ه
ه
⚠ *الشيوعي: لن نعود ل(الحرية والتغيير) ونعمل على اسقاط الحكومة* :
👈 الخرطوم: سودان لايت…. أوصد الحزب الشيوعي الباب امام قوى الحرية والتغيير الساعية لاعادته للتحالف وجدد الحزب الشيوعي تمسكه باسقاط الحكومة الانتقالية وتكوين حكومة بديلة منحازة للشعب وأهداف الثورة…..
📌 ونحن بدورنا نطلب من الإسلامي الإعلامي (الكبير) حسين خوجلي ان يدعوكم الى الخروج من بار قرد الغلوطية والانضمام الى التيار الإسلامي العرييييض حيث ال 98% يا الخطيب….
ه
ه
📰 الوطن:
👈 التقت حمدوك.. مسؤولة أمريكية سندعم السودان بقوة لإستكمال المعجزة
📌 فعلا هي معجزة وعلى قول الشاعر: بل هي آية من صنع البديع
ه
📰 الوطن:
👈 المالية :الموازنة المقبلة تنفذ سياسات التحرير وتوحيد سعر الصرف
📌 التحرير دا ما اتعرف له حد بقى زي تحرير فلسطين
ه
📰 الوطن:
👈 الري تجدد التحذير من اقتراب الفيضان وارتفاع معدل النيل الأزرق
📌 شغلكم بقى زي ناس الأمم المتحدة هم يبدوا قلقهم وانتو تحذروا
ه
📰 الوطن:
👈 حركة تحرير بني شنقول تدعو المجتمع الدولي لإدانة حكومة أبي أحمد على المجازر بالإقليم
📌 لو عاوزين تحركوا المجتمع الدولي شوفوا لكم خواجه جيبوهو في نصكم خلوا ابي احمد يضربوا
ه
📰 الحراك السياسي:
👈 استعادة 13 محلجًا لمشروع الجزيرة والمحافظ يعدّ بتمزيق فاتورة”القمح”
📌 شربوتكم قوي
ه
📰 الحراك السياسي:
👈 وزير التجارة لـ”الحراك السياسي”: سحب السجل والغرامة 100 ألف دولار للمتهرّب من تسديد حصائل الصادر
📌 أيوااااا كدا يادووووب بديتوا في الطريق الصاح ، موش تقول لي غرامة 100 الف جنيه
ه
📰 الحراك السياسي:
👈 ضبط شبكة تهريب سودانيين عبر مطار الخرطوم لبيع أعضائهم في مصر
📌 اها عاد دي بضاعة مستحيل تتهرب عن طريق المناطق الحساسة
ه
📰 الحراك السياسي:
👈 “40”% انخفاض في الإصابة بـ”كورونا” رغم تخوّفات أطباء من”السلالة الهندية”
📌 يعني لو اجتمعوا علينا (قحت) والذين هبطوا من السماء والكورونا والخريف وغلاء الأسعار فاضل لنا شنو من عذاب القبر غير الشجاع الأقرع
ه
📰 الحداثة:
👈 النائب العام: مصر ترفض التعاون في تسليم متهمين عبر”الإنتربول”
📌 بسيطة افتحوا الباب لي ناس معتز مطر ومحمد ناصر خلوهم يجوا يشرشحوا السيسي
ه
📰 الحداثة:
👈 اتهامات للمراجع المقال بـ”التلكؤ” في تسليم مهامه
📌 اصبروا يا إخواننا في ملفات محتاج يضايرها الزول دا وراهو مصالح ناس
ه
📰 الحداثة:
👈 مهيد صديق: الحكومة الانتقالية يجب أنّ تضع استراتيجية واضحة للخروج من مأزق المحاور
📌 مين دا ؟
ه
📰 الحداثة:
👈 “الطيران المدني” تنفي ما يشارع عن مهدّدات تواجه عملها
📌 هو الطيران المدني وقت عايش لي هسع تاني مابتجيهو عوجة
ه
📰 اليوم التالي:
👈 تلف أدوية بقيمة”11″ مليون دولار
📌 أها دي المسؤول عنها منوووو؟
ه
📰 اليوم التالي:
👈 وساطة إسرائيلية لحلّ أزمة سدّ النهضة
📌 كععع خذوا الحكمة من افواه الصهيونية
ه
📰 اليوم التالي:
👈 وزير المالية: يمكن النظر في طلبات المتضرّرين من إلغاء الدولار الجمركي
📌 شوف المتضرر
ه
📰 اليوم التالي:
👈 وزير الطاقة: ترتيبات لزيادة الربط الكهربائي مع إثيوبيا لـ”3″ أضعاف
📌 خلاص كلموا المنصورة
ه
📰 الصيحة:
👈 والي غرب كردفان لـ”الصيحة”: نمتلك الأدّلة بضلوع عناصر النظام البائد في الأحداث
📌 دي ما محتاجة أدلة
ه
📰 الصيحة:
👈 إيقاف تسجيل الشركات
📌 بالطقاق
ه
📰 الصيحة:
👈 لجنة متابعة اتّفاق السلام برئاسة”حميدتي” تتّخذ عددًا من القرارات
📌 الله يستر باكر ما يجي واحد من المسارات يرفض القرارات دي
ه
📰 الصيحة:
👈 الأمة لـ”الصيحة”: جهات تسعى لخلق صراعات واستبدال الحواضن السياسية
📌 ناس الامه ديل يحبوا النميمة ، يعني شنو جهات ، سمو الأشياء بمسمياتها او اصمتوا
ه
📰 النيل الدولية:
👈 البرهان يؤكد حرص السودان الراسخ على تعزيز العلاقات مع المغرب
📌 راسخة من زمن الفريق طه الحسين
ه
📰 النيل الدولية:
👈 (المساحة العسكرية) تتفقد العلامات الحدودية مع إثيوبيا في الفشقة
📌 زمان المسح دا ما نسمع به الا في أمسح اكسح ما تجيبو حي
ه
📰 النيل الدولية:
👈 مصرع شخص واصابة نظاميين في اشتباك بين أهالي وقوات عازلة بغرب كردفان
📌 يعني تاني القوات لما تمشي تعزل بين جهتين الا تبني حيطة
ه
📰 النيل الدولية:
👈 واشنطن تدعم السودان بـ700 مليون دولار لمواجهة التحديات الراهنة
📌 أبو جناه ولاقاه ادوها مني مناوي خلوهو يمشي يستلم شغله
ه
📰 النيل الدولية:
👈 حزب الأمة يطالب بتوسيع اتفاق السلام ليشمل الحركة الشعبية
📌 ياخي الحركة الشعبية دي زي الاميبيا كلما يتفقوا معاها تنقسم ويظهر جزء جديد
ه
📰 أخبار اليوم:
👈 ضبط شبكة تعمل في تجارة الأعضاء البشرية داخل مشارح الخرطوم.
📌 يا دي النيلة من فضايح المشارح ال مابتعرف تنتهي
ه
📰 أخبار اليوم:
👈 وكيل المالية تحدد ملامح إعداد موازنة العام 2022م.
📌 أكيد نفس الملامح والشبه لأن العرق دساس
ه
📰 أخبار اليوم:
👈 حمدوك يطلع على الهيكلة الجديدة لقوى اعلان الحرية والتغيير.
📌 أمحق قوى
ه
📰 أخبار اليوم:
👈 عوضية كوكو تسلم رسالة خطية الى مديرة الوكالة الامريكية للتنمية الدولية سامنتا باور.
📌 يا حليل اخوات نسيبة والكارينا الليمونية
ه
📰 السوداني:
👈 زيادة مُستمرّة في مناسيب النيل والخرطوم تقترب من الفيضان
📌 ماهو نحن لازم تكون عندنا زيادة مدمرة في حتة ما يا (الدولار) يا (النيل) يا (هجمات النيقرز والمتفلتين) المهم لازم نكون في خوف وخطر عشان نعرف ننوم
ه
📰 السوداني:
👈 والي سنار لـ”السوداني”: الوضع خطيرٌ وأرسلنا استغاثة للمركز
📌 المركز براهو ما فضل له الا يلبس بامبرز
ه
📰 السوداني:
👈 لتأخُّره عن الزمن 10 دقائق.. منع رئيس المجلس المركزي لحزب المؤتمر السوداني من الدخول للمؤتمر
📌 سنة يا اليابان والدقة في المواعيد
ه
📰 السوداني:
👈 “سمانتا باور”: ‏زيارتي للسودان تهدف لتعزيز شراكة الحكومة الأمريكية مع قادة السودان الانتقاليين والمواطنين
📌 طبعا (الحاجة) دي قاصدة بكلمة الانتقاليين دي يعني مافي زول يفكر يقعد فيها لحدي ما تجي ثورة تانية
ه
📰 السوداني:
👈 “سمانتا باور”: ‏نبحث سبل توسعة دعم الوكالة الأمريكية للتنمية الدولية للفترة الانتقالية في السودان
📌 وسعوها الله لا ضيقها
ه
📰 السوداني:
👈 مديرة المعونة تبحث الدعم التنموي الأمريكي للسودان
📌 ما محتاج بحث ، ابدي من أي مكان يعجبك وبأي حاجة تعجبك
ه
ه
📌ابووضاح 📌
https://www.facebook.com/dababies